Titus Taliadbonus yw canwriad gwersyll Rhufeinig Dalpenrhesum. Mae e bron â torri’i fol eisiau gwybod beth yw’r gyfrinach y tu ôl i nerth rhyfeddol y rhyfelwr dewr Asterix, a gweddill y Galiaid sy’n byw yn y pentre gerllaw. Caiff y llengfilwr di–nod, Caligula Minus, ei anfon i ysbïo ar drigolion y pentre a dod o hyd i'r gyfrinach. Yno, mae'n cael swig o ddiod hud y derwydd Gwyddoniadix sy’n rhoi nerth goruwchddynol i’r Galiaid. Mae hynny’n ddigon o reswm i’r Rhufeiniaid benderfynu cipio Gwyddoniadix i geisio cael gafael ar gyfrinach y ddiod hud. Ond mae Asterix yn benderfynol o achub y derwydd – ac ar yr un pryd ddysgu gwers i’r Rhufeiniaid a’u dwylo blewog.