LLYFRAU LEWSYN LWCUS

Yr artist Morris oedd ‘tad’ Lewsyn Lwcus, a fe oedd yn gyfrifol am ddarlunio’r straeon o 1946 tan iddo farw yn 2001. Yn dilyn blynyddoedd o weithio ar ei ben ei hun ar y gyfres, dechreuodd gydweithio gyda’r awdur René Goscinny gan greu anturiaethau sy’n cael eu hystyried fel oes aur Lewsyn Lwcus – a rhai o’r llyfrau o’r cyfnod hwn sydd wedi ymddangos yn Gymraeg. Pan fu farw Goscinny yn 1977, camodd nifer o awduron eraill i’r adwy i greu storïau Lewsyn Lwcus, gan gynnwys Raymond ‘Vicq’ Antoine, Bob de Groot, Jean Leturgie, a Lo Hartog van Banda.

Wedi marwolaeth Morris yn 2001, cododd yr arlunydd Achdé  fantell arlunio llyfrau Lewsyn Lwcus, gan gydweithio â’r awduron Laurent Gerra, Daniel Pennac a Tonino Benacquista.

Mae anturiaethau Lewsyn Lwcus wedi cael eu cyfieithu i Affricaneg, Almaeneg, Arabeg, Bengaleg, Bosnieg, Catalaneg, Croateg, Cymraeg, Daneg, Eidaleg, Estoneg, Fietnameg, Ffinneg, Hebraeg, Hwngareg, Indoneseg, Isalmaeneg, Islandeg, Llydaweg, Norwyeg, Pwyleg, Portiwgaleg, Saesneg, Sbaeneg, Serbeg, Slofeneg,  Swedeg, Tamil, Tsieceg, a Thwrceg.